isa blu

isa blu lagar draumande, nostalgisk pop som får deg til å tenkje på barndommen, og kanskje grine litt i skjul bak solbrillene. Med ein miks av elektroniske og organiske element, og den mjuke og nære stemma til Isabell, blir det trekt linjer til artistar som Billie Eilish, The Marias og Lizzy McAlpine.

 

Artisten frå Bremanger, ei øy ytst i havgapet, har tatt steget ut på den norske musikkscena i lag med produsent og låtskrivar Karl Erik Jørgensen (brenn., Pikekyss). Saman reiser paret heim til bygda for å finne ro til å jobbe med musikken. Debutlåta dear marie blei tatt godt imot og fekk varme anbefalingar frå blant anna NRK P3, og 730.no. I fjor sommar hadde isa blu sin debutkonsert på hovudscena på SALT under Øyatirsdag, og med meir ny musikk på veg, held ho fram med å markere seg som ein unik artist ein kan forvente å sjå meir av framover.

No kjem isa blu til oss i Balestrand – og vi kan knapt vente på å høyre den draumen av ei stemme ute ved fjorden.